नेपाल धितोपत्र बोर्डमा किन अड्कियो ५४.३४ अर्बको आइपीओको फाईल ?

काठमाडौँ, २५ चैत । नेपाल धितोपत्र बोर्डले निर्णय गर्न ढिलो गर्दा आइपिओ निष्काशन गर्न अनुमती मागिएको फाईलहरुको खात लागेको छ ।

गत मंसिरमा नेपाल धितोपत्र बोर्डको अध्यक्षमा नियुक्त भएका सन्तोष नारायण श्रेष्ठले एक/दुई वटा फाईल बाहेक कम्पनीको आइपिओ अनुमती अगाडि बढाएका छैनन् । ५४ अर्ब ३४ करोड ७१ लाख रुपैयाँ बराबरको ३८ करोड ७३ लाख ८४ हजार ८८२ कित्ता सेयर निष्काशनकोलागि ८४ कम्पनीले नेपाल धितोपत्र बोर्डमा फाईल पेश गरेका छन् ।

आइपिओ अनुमतिको पाइपलाईनमा रहेकामध्ये सबैभन्दा धेरै ४३ वटा हाइड्रो कम्पनी छन् । उत्पादन तथा प्रशोधन क्षेत्रका १६ कम्पनी, होटेल तथा पर्यटन क्षेत्रका ७, इन्भेष्टमेन्ट र माइक्रो इन्स्योरेन्स ३/३ र माइक्रो फाइनान्स १ कम्पनी लगायत अन्य क्षेत्रका ११ वटा कम्पनीले आइपिओ निष्काशनको अनुमति मागेका छन् ।

तर प्रतिनिधि सभाको सार्वजनिक लेखा समितिको हस्तक्षेप, अख्तियार दुरुपयोग अनुसन्धान आयोगको छानबिन र महालेखा परिक्षकले देखाएको कैफियतका कारण श्रेष्ठलाई आइपिओ अनुमति दिन सकस परेको हो ।

लेखासमितिले गतवर्ष पुषमा नेटवर्थ ९०  भन्दा कम भएका कम्पनीलाई आइपिओ स्वीकृति नदिन निर्देशन दिएको थियो । त्यस्तै प्रिमियम मूल्यको आइपिओमा पनि उनले अनुमति दिएका छैनन् । नेपाल धितोपत्र बोर्डले अषाढमै समितिको निर्णय कार्यान्वयन गर्ने निर्णय गरेका कारण नेटवर्थ कम भएका कम्पनीले अनुमति नपाएका हुन् । प्रिमियम मूल्यको आइपिओमाथि महालेखा परिक्षकको कार्यालयले प्रश्न उठाएको छ । यसअघिका अध्यक्ष रमेश कुमार हमालले कम्पनीलाई फाइदा हुनेगरी आइपिओ निष्काशन स्वीकृति दिएको विषय अख्तियारको छानबिनमा छ । लेखा समितिले कार्यदल बनाएरै छानबिन गरिरहेको छ ।

नेपाल धितोपत्र बोर्डमा आवेदन दिएका कम्पनीहरुले अंकित मूल्य बाहेक प्रिमियम र बुकबिल्डिङमार्फत् आइपिओ निष्काशन गर्न चाहेका छन् । बोर्डले अंकित र प्रिमियम मूल्य मात्रै नभएर बुकबिल्डिङको आइपिओ माग गरेका कम्पनीलाई पनि अनुमति दिएको छैन । वित्तीय विवरण हेरफेर गरेर गत अषाढमा रिलायन्स स्पिनिङ मिल्सले बुकबिल्डिङमार्फत् आइपिओ निष्काशन गर्न खोजेपछि विवाद भएका कारण नेपाल धितोपत्र बोर्ड हच्किएको हो ।

प्रवक्ता निरञ्जय घिमिरेका अनुसार - ''कम्पनीहरुको वित्तीय विवरण अपडेटको काम  भइरहेको छ । आवश्यक कागजात पुगेका कम्पनीहरुलाई नेपाल धितोपत्र बोर्डले अनुमति दिईरहेकै छ ।''